邱禮濤執導電影《復仇的人》昨日（30日）舉行開鏡拜神儀式，除了劉青雲 、鄧濤等主演外，還有首曝光的新角色蔡少芬 （Ada）和邱彥筒 （Marf），二人一同受訪，Ada指今次是繼電影《山水有相逢》後相隔31年再與劉青雲合作，屬客串性質，一見到青雲已讚對方靚仔又瘦了，很期待再合作。問到為何會答應今次演出，Ada說：「最主要係導演嘅啫，因為導演Herman搵我嘅時候，我一聽到我經理人話俾我聽，我就即刻話『咩都唔好講，拍啦！咩角色我都做！』總之Herman搵我我就做！」二人過往曾合作《同門》等電影，Ada因而很欣賞，也很「錫」邱禮濤，「佢又對我好好，所以我心裏面係好感激，總之佢搵我就會做。」

Ada今日是首日開工，其角色為曾傲棐（Arvin）媽咪，有財力、勢力和屬於控制狂，她說：「我今日係第一日造型，未對鏡頭拍過，所以講唔出嗰種興奮嘅感覺。啱啱見咗佢，我就話『衰仔，搞咩呀你！』因為我知道佢喺入面做咗一啲嘢，我都係其中一個復仇的人。」但她笑言劇組準備的裝束、行頭已經夠勁，無需要她出動私伙。Ada主要戲份是跟青雲拍攝，講到相隔多年再拍港產片感覺如何，Ada透露因為上年拍攝了邵氏劇《風華背後》，都有keep住拍嘢，所以感覺不錯，加上只是客串，心情也會不一樣。

電影主題與校園欺凌、網暴有關，身為人母的Ada對此特別痛心，也會特別叫仔女在網上世界小心：「加埋我哋做呢行，見到藝人俾人網暴，又或者一啲唔係咁好嘅消息，不停俾人炒作，都會好難過，會覺得唔好咁啦！好似令到成件事好負面，會令到啲人好傷，未必係咁差㗎啫，可唔可以正面啲呢大家？」她說自己很易過濾負面資訊，只要不看就可，但對於身邊朋友或子女，她就會勸對方或陪他們傾偈開解，Ada坦言難以阻止孩子接觸哪些資訊，表示：「永遠都唔知佢睇緊咩，就算封鎖其實冇用㗎嘛，佢哋有自己朋友，好容易就上網手機、iPad，所以好難，最緊要同佢喺呢度（思想上）做功課，多啲傾偈。」她說家中規矩是食飯時禁用手機，要一家人把握這個時間好好相處。

Ada談到，早前朋友女兒過身，跟她大女年紀一樣，當然全家人都很傷心，但她感恩的是，大女出席完對方的喪禮後主動對她敞開心扉：「佢突然話俾我聽話媽媽我醒咗，原本生命可以咁短，我以為自己好年青，原來周圍嘅嘢係可以突然間離開我，跟住佢突然間同我講話『我想同你傾多啲偈』，佢自己主動同我講，我話『吓？』」Ada也在學習如何跟女兒溝通，試著不要太專制，放下自己身段跟女兒道歉、問對方會否有什麼使她不舒服等，此時她問Marf：「我唔知我算唔算係一個好媽媽？但係我都盡力。」Marf則說：「 好好呀！令到小朋友安心得來又肯去講嘢俾你聽。我覺得你可以開個Channel去討論，你好有心得，你真係會研究再去搵一個方法去應付。」Ada就表示不敢，自己也在學習中，更對Marf說：「所以我就話喺你哋啲年青人身上我就學到好多嘢。」