前無綫電視（TVB）資深監製兼戲劇組製作部經理梁材遠（人稱「材叔」）離世，終年75歲。據知梁材遠昨午在沙田威爾斯親王醫院病逝。梁材遠於1975年畢業於香港浸會學院歷史系碩士，同年加入TVB，由《歡樂今宵》見習編劇同資料搜集做起，期間短暫轉投麗的電視與佳藝電視，1978年重返TVB後參與《網中人》、《火玫瑰》等名劇的編導工作。1980年正式升任監製後，首部執導作品為《中四丁班》，真正將他推上事業高峰作品為與編劇韋家輝合作。他擅長捕捉人性細節與社會脈搏，1988年由他監製、韋家輝編審的《誓不低頭》轟動一時，創下極高收視，成為港劇史上的經典之作。90年代升任製作部經理後，他策劃《茶是故鄉濃》、《酒是故鄉醇》等，同樣叫好叫座。

曾合作《金石良緣》、《老友狗狗》、《蒲松齡》、《紫禁驚雷》、《造王者》、《守業者》的馬浚偉接受東網獨家訪問時表示：「好突然好難過！我今年四月先同佢聯絡過，講好咗話會約飲茶！材叔係喺TVB裏面好錫我好錫我嘅監製，我拍咗好多佢嘅作品，佢成日叫我做小隊長，佢話有我開工佢好放心，我亦都真係好尊重好尊重佢！好唔捨得，希望他日天家再見！」

曾合作過《飛短留長父子兵》、《造王者》的視帝黎耀祥，接受東網獨家訪問時表示：「材叔走咗都覺得好可惜，因為佢都係退休咗幾年，本來可以享吓福！材叔以前都好鍾意用我，佢個人好好、好隨和，係一個好好嘅監製，希望佢屋企人節哀順變，永遠懷念佢！」

曾合作過《果欄中的江湖大嫂》的陳煒，曾跟TVB金牌監製兼戲劇組製作部經理梁材遠合拍兩劇，她接受東網獨家訪問時聲線沙啞似哭泣中說：「我啱啱睇到呢個消息都好唔開心，之前我哋都會相約一齊食飯，因為佢真係好嘅前輩，我入咗TVB都畀咗好多機會我，好似《果欄中的江湖大嫂》、《火線下的江湖大佬》，佢好多次都用我做主角，我真係好感激佢，好似爸爸都和藹可親嘅前輩，畀好多表演空間我發揮，多謝佢提攜。」

視帝陳展鵬同樣感激梁材遠以往給予自己不少演出機會，表示：「我諗最多人識嘅應該係《張保仔》，大家都好唔捨得佢。呢年幾兩年都知道佢有啲唔舒服，我有搵過佢，但佢好少再出嚟，都唔想打擾老人家。之前都係商場撞過佢同佢傾吓偈，因為佢好鍾意科技同電子嘢，希望佢家人唔好太過傷心，我會睇番同佢合作過嘅劇集懷緬佢。」

而合作過《大醬園》的朱晨麗接受東網獨家訪問時表示：「我依家心情十分之難過。慶幸能參與到材叔離巢前最後一個作品《大醬園》。拍攝時材叔佢都會親身提點、耐心指導，令我好好磨練演技，令我見識到一位資深電視前輩對行業最真誠嘅熱誠。」