除咗係破紀錄之夜，亦都係德甲球會嘅威水一週！睇番週四同週五凌晨進行嘅歐羅巴聯賽賽事…

歐聯有拜仁擊敗皇馬，歐協有緬恩斯搞掂史特拉斯堡，費雷堡都唔「輸蝕」。主場面對切爾達維哥，可以話無論技術層面、戰術部署抑或體能儲備都高對手一班。整體嘅高位逼搶、三線嘅距離保持、球員減低自身失誤同隊友之間嘅串連補位都做得好好。比斯迪（Jan-Niklas Beste）貢獻1球1助攻，賽後獲選全場最佳無可厚非。球隊直到完場階段都幾乎可以擴大比數，鬥志與韌性可嘉！

切爾達維哥喺防守端嘅表現就唔係咁盡如人意，失誤亦都唔少，有效反擊都唔多。全場最好嘅機會來自後備入替嘅費亞盧比斯，可惜就食咗波底炒高。

博洛尼亞喺過去11場歐羅巴賽事都保持不敗，但偏偏近兩次面對維拉都係輸波而回，包括今季嘅聯賽首個比賽日對壘，今仗都唔例外，睇嚟都係注定命裡「剋星」。

博洛尼亞發揮唔算差，但係三個失波都係來自後防線嘅失誤。頂替史高立斯基嘅後備龍拉華基利亞（Federico Ravagli）錯誤判斷角球落點，盧坤美食唔住干沙；祖安美蘭達後場玩火導致希瑾被屈堅斯偷波射穿龍門大細；泰利文斯嘅傳中波令後防天下大亂全部漏曬，俾走甩嘅屈堅斯梅開二度。伊泰利安奴想修復失地，呢個今季一路存在嘅問題解決唔到都係濕滯。唯一安慰係路維同卡斯祖嘅戰意完全唔需要懷疑，尤其係前者由頭搏到尾，入波係對佢最好嘅回饋。

波圖喺過去歐羅巴聯賽五個主場全勝紀錄作古，次回合作客森林能否全身而退都係未知之數，特別佢哋還要分散精力應對士砵亭以及賓菲加喺聯賽嘅窮追猛打…

歐羅巴聯賽1/4決賽首回合賽事賽果-布拉加1-1 皇家貝迪斯波圖1-1 諾定咸森林費雷堡3-0 切爾達維哥博洛尼亞1-3 阿士東維拉

UEFA Europa League歐羅巴聯賽